නිවැරදි ධර්මය සැමදා විද්‍යමාන නොවේ..... අධර්මයෙන් එය වැසීයමින් පවතී......
ඔබ උපදින තැන තීරණය වීමට ප්‍රධාන වශයෙන් හේතු වෙන්නේ සීලයයි. පින උපදින තැන සැපයේ උසස් බව තීරණය වීමට හේතුවෙනවා. මේ නිසා සම්බුද්ධ ශාසනයක කරන පින්කම් වලින් උසස් ප්‍රතිඵල ලබන්න පුළුවන්.
1. සිල් රැකීම
පන් සිල්, අට සිල්, නවාංග උපෝසථ සීලය, දස සිල් රැකීම - සිල් රැකීම මාරක අපල දුරුවීමට පවා හේතු වේ.
ඔබ එක සිල් පදයකින් හරි සිල් රකින්න පටන් ගන්න. කාලයත් එක්ක ඔබ බොහෝ සිල් රකින්නකු වෙනවා අනිවාර්යයි. එක දවසක් එක පැයක් හෝ සිල් රකින්න උත්සාහ කරන්න. ඒ උත්සාහය ඉතා වටිනවා. ඒ උත්සාහයම ඔබව සුගතියට රැගෙන යනවා.
2. පින් රැස් කිරීම
සම්මාදිට්ඨිකව දාන ආදී විවිධ පින්කම් සිදු කිරීම
1. සීලයේ ආනිසංස
සුගතියේ උපතට හේතුවේ., මාරක දුරුවීමට හේතු වේ., සසර මතු දවසක නිවන පසක් කිරීමට හේතු වේ.
2. පිනේ ආනිසංස
පිනේ ආනිසංසය වැඩි කිරීමට සීලය හේතු වේ. මේ නිසා යමෙක් යමක් පූජා කරයිද ඒ සෑම අවස්ථාවක දීම සීලයක පිහිටා පූජා කිරීම ඉතා වැදගත්. එම පූජාවන් ලබන ප්‍රතිග්‍රාහකයා අනුව ද ආනිසංසය අඩු වැඩි වේ. මේ නිසා ඔබ නුවනින් යුතුව හැකි සෑම අවස්ථාවක දීම කුමක් පූජා කළ ද එය අග්‍ර ලෙසින් පූජා කිරීමට සැලකිළිමත් වෙන්න.
ඔබ සිදුකරන පූජාවන්ගේ ආනිසංස මේ තරම් අග්‍ර වීමට හේතුවනම් මහබෝසතානන් වහන්සේ පුරන ලද උතුම් වූ පාරමිතා බලයයි. එසේම උන්වහන්සේ අවබෝධකර දේශනාකරන ලද සද්ධර්මයයි.
ඔබට මතක ඇති පින්කමක් සිදුකරන සෑම අවස්ථාවකදීම සංඝයා වහන්සේලා අපට පන්සිල් දෙනවා. එසේ සිදුකරන්නේ අප සීලයක පිහිටා ඇතිවිට අප සිදුකරන පින්කමේ ආනිසංස මහත්ඵල මහානිසංස වෙන නිසා ය.
සීලයක් රැකීමේ දී එය සමාදන් වීම අනිවාර්යයි. සීලය සමාදන් නොවී රැකීමෙන් අපේක්ෂිත ප්‍රතිඵලය නොලැබේ. මේ නිසා තිසරණ සරණ ගොස් අනතුරුව සීලය සමාදන් වෙන්න. එසේ සමාදන්වෙන සීලය ඔබ විසින් රකින්නේ පැය එකක් ද දෙකක් ද, දවසක් ද දෙකක් ද එම ප්‍රමාණයට ඔබට ආනිසංස ගෙන දෙයි.
බොහෝ දෙනෙක්ට ඇති මාරක අපල ආදිය දුරුවීමට, ආයුෂ දීර්ඝ වීමට තිසරණයේ පිහිටා කල හැකි පින්කම් රාශියකි.
එසේම ඔබ සමාදන්වෙන සිල්පද කීයක්ද ඒ ප්‍රමාණයට ඊට අනුරූපව ආනිසංස ගෙන දෙයි. තිසරණය සමාදන් නොවී (සම්‍යදෘෂ්ඨික) නොවී රකින සීලයෙන් තිසරණය සමාදන් වී රකින සීලය තරම් මහත්ඵල මහානිසංස නොදෙයි.
මේ නිසා තිසරණයේ පිහිටා සීලයක් සමාදන් වී යම් පිනක්, පූජාවක් කරයිද එයින් ලැබෙන පිනේ ආනිසංසය ඉතා ඉහළයි.
බුදුරජානන්වහන්සේ ඇතුළු සංඝයා උදෙසා යම් දෙයක් පූජා කරයිද, යම් පිංකමක් කරයිද එයින් ලැබෙන ආනිසංසය අන් කිසිවකට සම නොවී අග්‍ර ලෙස මහානිසංස වෙයි.
තවදුරටත් ඒ අවස්ථාවේ දී ඔබ සමාදන් වී සිටින සීලය අනුව ද එහි ප්‍රතිඵල වැඩි වේ.
වර්ථමානයේ ජීවමානව නැතත් තුන්ලෝකාග්‍ර වූ භාග්‍යවත් වූ අර්හත් වූ සම්මා සම්බුදුරජාණන් වහන්සේ වෙනුවෙන් පුද සත්කාර සිදුකළ හැකි චෛත්‍ය තුන් වර්ගයකි.
1. ශාරීරික - චෛත්‍යය
2. පාරිභොගික - චෛත්‍යය
3. උද්දේසික - චෛත්‍යය
මෙම චෛත්‍ය වන්දනා කිරීම මහත්ඵල මහානිසංස ලැබිය හැකි පින්කමකි.
ධාතු පුරාණය
¤☸¤══════¤☸¤☸¤══════¤☸¤
